ព័ត៌មានសង្គម៖ កូរ៉េខាងជើង បានថ្លែងនាថ្ងៃសៅរ៍ ទី២ ខែសីហា នេះថា ប្រទេសនេះសង្ឃឹមថា ជម្លោះព្រំដែនរវាងកម្ពុជា - ថៃ នឹងឈានដល់ការបញ្ចប់ ដោយត្រឡប់មកមានសន្តិភាព និងស្ថេរភាពវិញ នេះបើយោងតាមសារព័ត៌មាន Koreatimes បានចុះផ្សាយ។

ពិតណាស់ ទំនាស់ព្រំដែនរវាងកម្ពុជា - ថៃ បានឈានដល់ការផ្ទុះអាវុធកាលពីថ្ងៃទី២៤ខែកក្កដា ប៉ុន្តែនាថ្ងៃទី២៨ ខែកក្កដា វេលាម៉ោង ០០ : ០០ នាទីកន្លងទៅ ប្រទេសទាំងពីរបានយល់ព្រមលើបទឈប់បាញ់ ដោយគ្មានលក្ខខណ្ឌ ក្រោយចូលរួមក្នុងកិច្ចប្រជុំបទឈប់បាញ់ ធ្វើឡើងនាទីក្រុងកូឡាឡាំពួរ ប្រទេស ម៉ាឡេស៊ី ប៉ុន្តែស្ថានភាពតាមព្រំដែន មិនទាន់ធូរស្រាលទាំងស្រុងនៅឡើយទេ។

ដូច្នេះហើយទើប អ្នកនាំពាក្យរបស់ក្រសួងការបរទេស កូរ៉េខាងជើង បានថ្លែងថា៖

"ពួកយើងសង្ឃឹមថា ប្រទេសទាំងនេះនៅអាស៊ីអាគ្នេយ៍ នឹងទទួលបានសន្តិភាពនិងស្ថេរភាព នៅក្នុងតំបន់ ដោយដោះស្រាយទំនាស់នឹងគ្នា ព្រមទាំង ធ្វើឲ្យមានការទុកចិត្តលើផ្នែកនយោបាយយ៉ាងជ្រាលជ្រៅ ព្រមទាំងផ្សព្វផ្សាយសហការជាទ្វេភាគី។"

ប្រភព៖ koreatimes