សម្តេចតេជោ ហ៊ុន សែន ប្រកាស​បរិច្ចាគ​ដី​ ២ហិកតា​ តម្លៃ​ជាង ១០លាន​ដុល្លារ សាងសង់​អន្ទេវាសិកដ្ឋាន​សម្រាប់​និស្សិត​នារី​ក្រីក្រ

//s9.kh1.co/90/90b49dc7c2dcc0161e9529f54f6ff04c3958d4b5.jpg
សង្គម

 ០៤-មិថុនា-២០២៥ ៣ល្ងាច · ២ ថ្ងៃមុន

សម្តេចតេជោ ហ៊ុន សែន ប្រកាស​បរិច្ចាគ​ដី​ ២ហិកតា​ តម្លៃ​ជាង ១០លាន​ដុល្លារ សាងសង់​អន្ទេវាសិកដ្ឋាន​សម្រាប់​និស្សិត​នារី​ក្រីក្រ

រាជធានីភ្នំពេញ ព្រឹកថ្ងៃទី០៤ ខែមិថុនា ឆ្នាំ២០២៥ – បន្ទាប់ពី​ដឹកនាំ​កិច្ចប្រជុំ​ក្រុមប្រឹក្សាជាតិ​ដើម្បី​ស្ត្រី សម្តេច​អគ្គមហាសេនាបតីតេជោ ហ៊ុន សែន ប្រធាន​ក្រុមឧត្តម​ប្រឹក្សា​ផ្ទាល់​ព្រះមហាក្សត្រ បាន​ប្រកាស​ពី​ការសម្រេចចិត្ត​ដ៏​មាន​អត្ថន័យ​ក្នុងនាម​ជា​មេគ្រួសារ ក្នុងការ​បរិច្ចាគ​ដី​ផ្ទាល់ខ្លួន​ទំហំ ២ហិកតា សម្រាប់​សាងសង់​អន្ទេវាសិកដ្ឋាន​ជូន​និស្សិត​ជា​ស្ត្រី​ក្រីក្រ​មកពី​បណ្តា​ខេត្ត ដែល​កំពុង​បន្ត​ការសិក្សា​នៅ​រាជធានីភ្នំពេញ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ការសម្រេចចិត្ត​នេះ ធ្វើឡើង​បន្ទាប់ពី​សម្តេចតេជោ​បាន​ពិភាក្សា​ជាមួយ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជា​ភរិយា និង​កូនស្រី។ អំណោយ​ដី​ដ៏​ថ្លៃថ្លា​នេះ ស្ថិតនៅ​តំបន់​ជ្រោយចង្វារ ដែល​កន្លងមក​សម្តេចតេជោ​បាន​ទិញ​ក្នុងតម្លៃ​ជាង ១០លាន​ដុល្លារ​អាមេរិក ក្នុង​គោលបំណង​សាងសង់​ស្ថានីយទូរទស្សន៍​បាយ័ន។ ពេលនេះ ដី​នឹងត្រូវ​ប្រគល់ជូន​ក្រសួង​កិច្ចការនារី ដើម្បី​​សាងសង់​អន្ទេវាសិកដ្ឋាន​សម្រាប់​និស្សិតនារី។

អន្ទេវាសិកដ្ឋាន​នេះ គ្រោង​នឹង​សាងសង់​ឡើង​ដើម្បី​ផ្តល់​កន្លែង​ស្នាក់នៅ​ដល់​និស្សិត​ស្ត្រី​ចំនួន ៥០០នាក់។ ក្នុង​នោះ បន្ទប់នីមួយៗ​នឹង​រៀបចំនិស្សិត​ស្នាក់នៅ​ចំនួន ៤នាក់ ដោយមាន​ភ្ជាប់​ជាមួយ​បន្ទប់ទឹក និង​ចង្ក្រានបាយ​ដាច់ដោយឡែក ដែល​សរុប​តម្រូវ​ให้​មានការ​កសាង​បន្ទប់​ចំនួន ១២០បន្ទប់។

បន្ថែម​ពីលើ​កន្លែង​ស្នាក់នៅ សម្តេចតេជោ​ក៏បាន​ណែនាំមានការ​កសាង​ប៉ុស្តិ៍​សុខភាព​មួយ​នៅ​ជាន់​ផ្ទាល់ដី​នៃ​អគារ​អន្ទេវាសិកដ្ឋាន ដែល​នឹង​រួមមាន​បន្ទប់​សម្រាប់​ពិនិត្យ​ជំងឺ និង​បន្ទប់​សម្រាប់​គ្រូពេទ្យ​ប្រចាំការ ដើម្បី​ធានា​សុខុមាលភាព​របស់​និស្សិត​ដែល​ស្នាក់នៅ​ទីនោះ។

សម្តេចតេជោ​បាន​បញ្ជាក់​ថា ក្រោយ​ពេល​បញ្ចប់​ការសាងសង់ អន្ទេវាសិកដ្ឋាន​នេះ​នឹងត្រូវ​ប្រគល់ជូន​ជា​សម្បត្តិ​រដ្ឋ ហើយ​ការគ្រប់គ្រង​នឹង​ស្ថិតនៅក្រោម​ការទទួលខុសត្រូវ​របស់​ក្រសួង​កិច្ចការនារី។

សម្តេចតេជោ បាន​សម្តែង​ក្តីសង្ឃឹម​យ៉ាង​មុតមាំ​ថា៖ «ខ្ញុំសង្ឃឹមថា​អន្ទេវាសិកដ្ឋាន​នេះ​នឹង​ជួយ​កាត់បន្ថយ​ការលំបាក​របស់​និស្សិត​ជា​ស្ត្រី និង​ជួយ​ពន្លឿន​ដល់​ការវិនិយោគ​កសាង​សមត្ថភាព​របស់​ស្ត្រី និង​ការចូលរួម​របស់​ស្ត្រី​ក្នុងការ​កសាង​ប្រទេសជាតិ»។

ប្រភព៖ ក្រសួងព័ត៌មាន

រូបភាព
រូបភាព
រូបភាព
រូបភាព
រូបភាព
រូបភាព
Roth Karona
R.N

អត្ថបទទាក់ទង

រក្សាសិទ្ធិ Mediaload
Powered by Bong I.T Bong I.T